کوچيان: که ټول افغانستان يوه ټاکنيزه حوزه نه شي، په ټاکنو کې ګډون نه کوو

په ولسي جرګه کې د کوچيانو استازو ګواښ وکړ، چې که د پخوا په څېر ټول افغانستان د کوچيانو 
لپاره يوه ټاکنيزه حوزه نه شي، په راتلونکي ولسمشريزو ټاکنو کې ګډون نه کوي.
دا په داسې حال کې ده، چې ولسي جرګې د غويي په ١٤مه پرېکړه وکړه، چې په پارلماني ټاکنو کې افغانستان د کوچيانو لپاره په لسو ټاکنيزو حوزو ووېشل شي، خو د جرګې ځينو غړو دغه پرېکړه عادلانه نه بلله.
د ولسي جرګې د پرېکړې له مخې، د هېواد نورو اتباعو لپاره په پارلماني ټاکنو کې هر ولايت يوه ټاکنيزه حوزه ده.
په تېره شاوخوا يوه لسيزه کې د ملي شورا دوه ځلې ټاکنې د تقنيني فرمان له مخې ترسره شوې او په دې ټاکنو کې د کوچيانو لپاره ټول افغانستان يوه او د نورو اتباعو لپاره هر ولايت يوه ټاکنيزه حوزه و.
په ولسي جرګه کې د کوچيانو کمېسيون مشر حاجي نذير احمدزي وويل، چې په دې جرګه کې د کوچيانو استازو او د کوچي قوم مشرانو پرېکړه کړې چې ټول افغانستان بايد د کوچيانو لپاره يوه ټاکنيزه حوزه وي.
دى وايي، که دغه غوښته ونه منل شي، نو د ١٣٩٣ کال په ولسمشريزو او ولايتي شورا ګانو ټاکنو کې ګډونه نه کوي او په ټول افغانستان کې به په لاريونونو لاس پورې کړي.
هغه د ولسي جرګې پرېکړې ته په اشارې وويل: ((دغه پرېکړه د کوچيانو په حق کې ظالمانه ده، که د کوچيانو لپاره افغانستان په حوزو وېشل کېږي نو بايد نورو ته هم په حوزو ووېشل شي.))
احمدزى وايي، د ولسي جرګې د پرېکړې له مخې کوچيان نه شي کولاى، چې په ټاکنو کې برخه واخلي او د خپلې خوښې وړ کانديدانو ته رايه ورکړي، ځکه چې کوچيان په اوړي کې يو ځاى او په ژمي کې بل ځاى وي.
هغه له ولسمشر او مشرانو جرګې وغوښتل، چې د ټاکنو په قانون کې د ولسي جرګې ياده پرېکړه تاييد او توشيح نه کړي.
د ټاکنو قانون په طرحه کې د ولسي جرګې له خوا د دې موضوع تصويب وروستۍ پرېکړه نه ده، ځکه چې د اساسي قانون له مخې، د قانون مسوده د ولسي جرګې تر تصويب وروسته د تاييد لپاره مشرانو جرګې ته استول کېږي او د ولسمشر تر توشېح وروسته د قانون بڼه غوره کوي.
د ولسي جرګې د کوچيانو د کمېسيون په پرونۍ غونډه کې د کوچيانو يو شمېر قومي مشرانو هم ګډون درلود.
يوه قومي مشر حاجي غلام جان هم وويل، چې په ولسي جرګه کې د خپلو استازو له پرېکړې ټول کوچيان ملاتړ کوي.
هغه ګواښ وکړ، چې که د دوى ياده غوښتنه ونه منل شي نو په ټول افغانستان کې به لاريونونه پيل، لارې به بندې کړي او په ټاکنوکې به برخه وانخلي.
دغه راز د کوچيانو يو بل قومي مشر حاجې فيض محمدسهاک پژواک خبري اژانس ته وويل، چې کوچيانو ته بايد د پخوا په څېر ټول افغانستان يوه ټاکنيزه حوزه وي.
دى وايي، چې د نفوسو له مخې يوازې د حکومت په چوکاټ کې بايد کوچيانو درې وزيران او اوه واليان ولري او ګڼ شمېر رياستونه ورکړل شي.
هغه زياته کړه: ((موږ په ولسي جرګه کې)) په دې لسو وکيلانو اکتفا کړې خو اوس په دغه شان پرېکړو دوى غواړي، چې دا هم موږ نه واخلي، موږ دا پرېکړه نه منو.))
د ټاکنو قانون طرحه، چې په ١٧ فصلونو کې ٦٧ مادې لري، تېر کال په مرغومي مياشت کې د حکومت له خوا ولسي جرګې ته وړاندې شوې خو تر اوسه يې ټول مواد ولسي جرګې نه دي تصويب کړي.